بلوچی نیوزءَ شہ یک چاروکےءَ اے نہ وشیں حال سر بوت کہ چھبار و تیس ءِ نامداریں گشندہ تاج محمد تیسی پنجاہ و ھپت سالگیءَ 5 اکتبر2011 ءَ بیران بیتگ.
تاج محمد تیسی شہ کسانیا وتی وشیں توارءِ سببا بلوچستان ءِ تیاب گورا نامدار بیتگ. ماں چھبار و تیس تاج محمد پہ تاجل ، تاجک کور یا تاجک ارجنگ ناماں زانگ بیتگ. آ مادرزادی کور بیتگ و شہ دنیا ءِ ندارگانی کندگا زبھر بیتگ. تاج ءِ یاداشت ھنچوش باز بیتگ کہ آئیا ھر شعرے کہ بہ اشکتین ات، گوں ھما ساز و دابا پدا اوکل ئی کت.
تاج تیسیءَ گیشتر بلوچی شعر جتگ. البت ھندی شعر شہ محمدرفیع ، لتامنگشکر و مکیش گپتگ تا د گر وش توارانی آ واز آئیا یاد کتگ و گوں وتی منجلءِ ساز و سینہ، بوست بوستا اوکل کتگ انت. چھبار و تیس دمگا تاج محمد ھر آروسا گوں وتی وشیں توارا ورنایانی گل و شاد کنوک بیتگ.تاج تیسیءِ مشھور و نام کپتگیں شعر "من سبز ءِ وعدہ ءَ ننداں" کہ پسنی ءِ ناحدا محمداسلمءَ پربستگ، ماں تیاب گورا لوگ پہ لوگ مدام اشکنگ بیتگ. تاج تیسیءَ گجری بزاں فارسی شعر جنگا ھچ پیمیں واھگ نہ بیتگ و فارسی زیملا آئی ھچبر مسحور و مجذوب نہ کت. ایشی سبب بلکیں ھمیش انت کہ آئیءِ مستریں برات، مرحوم شیرمحمد ارجنگءَ گجرانی خلاف جھد کتگ. شیرمحمد ارجنگءَ وتی زندا شہ سید ظھورشاہ ھاشمی سبک زرتگ و متاثر بیتگ. شیرمحمد پہ بلوچستانءِ آجوئیا ماں چھبار دمگا یک آشوبی جھدکارے زانگ بیت.
تاج تیسیءِ مستریں برات شیرمحمدءَ سی و ھپت سال پیش، آزات بلوچستانءِ نوٹ گوں وتی دستاں نقاشی کتگ تانکہ شوں بہ دات کہ بلوچستانءِ آزاتیءِ جھد جاری انت. آ دوراں بلوچستانءِ نوٹءِ نفاشی و چاپ کنگ یک مزنیں کارے پہ بلوچستانءِ آزاتیءِ جھدا زانگ بیتگ.بژنءِ گپے اِنت کہ تاج تیسیءِ عمرملکموت ءَ گپت و اے ارمان ماں دلاں پشت کپت کہ بلوچستانءِ آزاتی ءِ راجی سوت یا سرود ملیءَ آئی گوں وتی وشیں توارا بہ وانیت. تاج تیسیءِ وشیں توار و آیی ءِ ھنر، و یات گوں بلوچی میوزیک و زیملا ماندگارانت. تاج تیسیءِ روحا پروردگار شاد بہ کنات و آئیا جنت نصیب بہ بات.
http://www.balochinews.com/2011/10/blog-post_11.html
No comments:
Post a Comment